/ Aktualitatea / Ayuntamientos /
Elhuyarreko eta Tolosaldea Garatzeneko arduradunak ez ezik, bertan izan dira ere Amasa-Villabonako eta Zizurkilgo udal-ordezkariak eta Tolosaldea LHI-ko zuzendaria.
Tolosaldea Garatzenek eta Elhuyarrek sustaturiko Bizilabe Tolosaldearen 2021-2022 ikasturteari amaiera emateko, aurten egindako zientzia- eta teknologia-esperimentu eta proiektuak aurkeztu dizkiete gazteek, guraso, lagun eta udal ordezkariei. Asteartean Zizurkilen egin zuten ekitaldia, eta atzokoan, Tolosaldea Lanbide Heziketa Institutuan.
Tolosaldea Garatzeneko Garbiñe Mendizabalek eta Elhuyarreko Edurne Gastonek egin zuten ongietorria. Segidan, Saioa Aranburu Etxezarretak, Bizilabeko orientatzaileak, urtean zehar egindakoa azaldu du. Ondoren, gazteek, taldeka aurkeztu dituzte proiektu eta esperimentuak: errealitate birtualeko betaurrekoak, plastilina eroalea, zianotipia, kristalizazioak, energia maketak, dirua sailkatzen duen makina, etab.
Estatuko zein nazioarteko ikerketek erakusten dutenez, halako bizipenek garrantzia eta eragin handia dute gazteengan; hainbat zeharkako konpetentzia lantzearekin batera, zientzia eta teknologiarako bokazioa pizten laguntzen baitute.
Senideek ez ezik, Beatriz Unzue, Amasa-Villabonako alkateak, Iker Urruzola, Zizurkilgo alkateak, eta Iñaki Pakea, Tolosaldea Insitutuko zuzendariak ere arretaz entzun dituzte gazteen azalpenak.
Elhuyar Zientzia Azoka, Bilbon
Aurten, lehen aldiz, Bizilabe sare osoaren ikasturte-amaierako festan ere parte hartuko dute Tolosaldeko gazteek, Euskal Herriko beste zenbait herritako gazteekin batera. Elhuyar Zientzia Azokaren 10. edizioaren barruan zientzia-proiektuen erakusketa egingo da ekainaren 2tik 5era Bilboko Areatzan, eta bertan hartuko dute parte Tolosaldea, Elgoibar, Soraluze eta Bilboko Bizilabe zentroetako gazteek, ikasturtean landutako gaiak publikoki erakutsiz. Ekainaren 5ean, Bizilabeko gazteen STEAM proiektuez gain, ginkana, tailerrak eta zientzia-ikuskizunak ere izango dira.
