/ Aktualitatea / Ayuntamientos /
“Energia, bizitzaren motorra” Eskola Agenda 2030 proiektuaren bitartez Tolosaldeko herri desberdinetako eskolek bi ikasturteetan lantzen ari diren gaia da. Lanbide Heziketako ikastetxeek ere prozesu horretan parte hartu nahi izan dute eta datorren ikasturtean elkarlanean martxan jarriko duten proiektua adostu dute dagoeneko.
Bost ikastetxe dira: Tolosaldea Institutua, Inmakulada Ikastola, Peñascal Kooperatiba, Don Bosco eta Fraisoro. Bakoitzak bere alorreko jakintzak aplikatuz egingo dio ekarpena proiektuari. Horrela, Tolosaldeko Institutua etxebizitzetan energia ikuskaritza eta aholkularitza egiteko formazioaz arduratuko da eta beraien ezagutzak Inmakulada Ikastola, Peñaskal eta Fraisoroko ikasleei transmitituko dizkiete.
Ikuskaritzak Peñaskal Kooperatibak dituzten tutoretzapeko pisuetan egingo dira. Etxe hauen erabiltzaileek energiaren erabilera egokia egiteko oinarrizko aholkuak jasotzeaz gain etxe hauetan detektatutako arazoei (gehiegizko gastua, ohitura ez egokiak…) irtenbideak emateko neurriak hartzeko ikasiko dute.
Fraisoro eskolaren ikasleen kasuan, jasotako formazioa beraien eraikinean aplikatuko dute datorren ikasturtean martxan jarriko den elikagaiak transformatzeko modulu berrirako instalakuntzetan. Modulu honetan kontsumo handiko makinaria erabili behar denez, energia arduraz erabiltzeko gomendioak nola aplikatu ikasiko dute.
Don Bosco Paper Eskolako Kimika industrialeko mailako ikasleek fatxadak isolatzeko materialen ikerketa lanetan arituko dira. Horretarako Fraisoro eskolak sortutako azpiproduktuak, egurra adibidez, erabiliko dituzte eta ikerketaren emaitzak frogatzeko Peñascaleko eraikuntzaren paretak erabiliko dituzte.
Baina eskolek proiektuarekin haratago joan nahi dute eta Tolosaldeko herritarrengana ailegatu nahi dute. Oinarrizko ikuskaritza egiteko fitxa erraz bat sortuko dute norberak bere etxean egin eta beharrezko hobekuntzak detektatu ahal izateko
Proiektua aurrera eramateko Tolosaldea Garatzen, Tolosa eta Zizurkilgo udalak, Tolosako Ingurumen Zentroa eta Ingurugelaren laguntza izango dute.
