Bizilabe Tolosaldea, dagoeneko martxan

Urritik maiatzera zientzia eta teknologiarekin zerikusia duten jarduera, esperimentu eta proiektuak garatuko dituzte gazteek.

Abiatu da Elhuyarrek eta Tolosaldea Garatzenek elkarlanean sustatutako Bizilabe Tolosaldearen ikasturte berria. BIgarren urtez, Tolosaldeko gaztetxoek zientzia- eta teknologia-jarduerak egingo dituzte, aisialdi-giroan.

Urritik maiatzera STEAM arloko hezitzaile baten gidaritzapean arituko dira lanean. Lehenengo hiruhilekoan, orotariko zientzia- eta teknologia-jarduerak egingo dituzte, diziplina desberdinak ezagut ditzaten. Urtarriletik aurrera, berriz, proiektu bat garatuko dute taldeka, eta zenbait ikertzaile profesionalen bisita jasoko dute.

Ohiko eskaintzaz gain, urtean zehar egitasmo ugari egingo dira: Emakume eta Neska Zientzialarien Nazioarteko Eguna, asteburuetako tailerrak, Bizilabe Azoka, Bizilabe gazteen topaketa, etab.

Oraindik ere bada izena emateko aukera; beraz, animatu, eta eman izena!