/ Aktualitatea / Emprendimiento /
Tolosaldea Garatzenek eta TAILSA-k 2024 amaierara arte luzatu dute ekintzaileei erraztasunak emateko akordioa.
Apattaerreka Industrialdearen sarreran zerbitzuen bulego-eraikina dago. Bada, bertan ekintzaileen enpresa berritzaileak finkatu daitezen laguntzeko hitzarmena berretsi dute TAILSA-k eta Tolosaldea Garatzenek.
Hazten ari diren eta beren kokalekua aldatu behar duten Tolosaldeko enpresa berriei, hobari bidez, alokairuan erraztasunak ematea da xedeetako bat. Lehiberri Zentroko haztegian egonaldia agortu duten enpresen kasua da horietako bat.
Horrela, goi-teknologia, bioteknologia, informazio eta komunikazioen teknologia, material berrien, energia-teknologia, kimika finen, medikuntza, nanoteknologia edota mekatronika sektoreetako enpresak erakarri nahi dituzte, besteak beste.
Igor Zapirain Lizarribar, Ibarrako alkate eta TAILSAko lehendakariak, eta Iker Urruzola Aizpurua, Zizurkilgo alkate eta Tolosaldea Garatzeneko lehendakariak izenpetu dute hitzarmena, gaur goizean. Hiru urteko indarraldia izango du, 2024ko abendura artekoa, eta ondoren ere luzatzeko aukera izango da.
Hitzarmenean hobarien esleipen-prozesua eta irizpideak ere finkatu dituzte. Gauzak hala, bideragarritasun tekniko, ekonomiko eta finantzarioaren azterketan, 50 puntu eskuratu beharko dituzte enpresek, gutxienez. Kanpo leudeke kaltegarri, osasungaitz edo arriskutsuak diren jarduerak.
Interesa duten enpresek Tolosaldea Garatzenen bulegoan egin beharko dute eskaera, dagokion dokumentazioarekin batera
