/ Aktualitatea / Ayuntamientos /
Tolosaldeko Eskolako Agenda 2030 proiektuak bi urteko zikloari hasiera eman dio. Eskualdeko hainbat ikastetxek eskoletako jasangarritasunari helduko diote, eta datozen bi urteetan gaurkotasun handiko gaia jorratuko dute, Energiarena, Ingurugelak, Tolosaldea Garatzenek eta Tolosako Ingurumen Zentroak elkarlanean koordinatuta.
Energia: bizitzaren motorra
Energia ezinbestekoa da bizitzeko: elikatzeko, janzteko, berotzeko, batetik bestera mugitzeko… Munduak energia behar du mugitzeko baina ezinbestekoa da kontuan izatea energia horrek uzten duen arrastoa. Energia lortzeko garaian ingurumenean inpaktua uzten dugun bezala, energia horrekin egiten dugunaren arabera ere eragina oso handia izan daiteke. Energiari ematen dizkiogun erabilerek Ama Lurra zaintzen lagun dezakete edo are gehiago degradatzea eragin dezakete.
Orokorrean energiarekiko dugun menpekotasuna handia da. Gure eskualdean erabiltzen dugun energia-iturri gehiengoa kanpotik dator (%90 inguru). Eta energiaren inguruan ematen ari diren azken egoeren ondorioz kontzeptu eta gertaera berriak ezagutzen ari gara: pobrezia energetikoa, energia subiranotasuna, krisi energetikoa, gerrak, migrazioak, larrialdi klimatikoa, trantsizio energetikoa, komunitate energetikoak…
Energiarekiko ditugun harremanak aldatu behar ditugu, energia berriztagarriak indartu behar ditugu, komunitate energetikoak sortu… Dena dela, arazoa ez da konpontzen berriztagarri gehiago jarriz, energia eredua da aldatu beharrekoa, aldaketa globala izan behar dugu eta adituek diotenez, desazkundearekin soilik lortuko omen dugu. Beraz, testuinguru zabala dugu gure esku artean, energiaren gaia jasangarritasunaren ikuspuntutik ezagutu eta aztertzeko.
Eta hori guztia Eskolako Agenda 2030 proiektuaren helburu nagusia ahaztu gabe, hau da, ikasleek beraien herriko etorkizuneko erabakietan parte-hartzeko ohiturak hartzea, demokratikoki erabakiak hartzen ikastea.
2022-2023 ikasturtean
2022-2024 Ikasturteetan aurrera egiteko aukeratutako helburua, 7. GJHa izango da, hau da, “Energia irisgarria eta ez kutsagarria” eta horren barruan, jorratzeko hartu den lelo nagusia ENERGIA, BIZITZAREN MOTORRA izan da. Herri mailari dagokionez jarraituko den antolaketa ondorengoa da:
- Proiektua lantzen duten eskolek harreman zuzena izango dute egiten diren koordinazio bileren bitartez.
- Ikasleak, gaian murgildu ahal izateko, motibaziorako jarduerak egingo dituzte garapen jasangarriari buruz orokorrean eta energiari buruz zuzenean.
- Herri diagnostikoak landuko dira. Horretarako ikasleek (adinera eta herrira) egokitutako materiala izango dute: gure energia nondik dator? Kaleak argiztatzeko sistemak eta argi kutsadura, pobrezia energetikoa, komunitate energetikoak, Tolosaldeko energia iturriak eta kontsumoen azterketa, Tolosaldea osatzen duten herri desberdinetako energia ereduak eta arazoak, Tolosaldeko energia bulegoak…
- Ondorioak aterata ikasturte bukaeran Udal Entzunaldiak egingo dira, Udal ordezkariei proposamenak eta konpromisoak helarazteko.
2022-23 ikasturtea diagnostikoan oinarrituko da batez ere eta bigarren ikasturtera begira esku-hartze plana diseinatuko da. 2023-24 ikasturtean ekintza plana edo esku-hartze plana deritzona gauzatuko da. Herri mailan, ikastetxe guztien esku-hartzea sustatuz, hainbat ekintza partehartzaile burutzea planifikatuko da.
Bi urtetako ziklo honi hasiera emateko Mirene Begiristainekin tailerrean parte hartzeko aukera izan dugu. EHUko irakasleak dimentsio ekosoziala eskola eremuan sartzeko irizpideak eman zituen.
Erronka ez da erraza baina ahalegin guztiak egingo ditugu, hezkuntza komunitate osoa elkartuta udal agintarien laguntzarekin, eskualdeko gazteak motibatzeko gizartearen aldaketan parte aktiboa izan dezaten.
Aduna, Anoeta, Asteasu, Berastegi, Ibarra, Irura, Tolosa, Villabona eta Zizurkilgo adin ezberdinetako 7.500 ikasle inguruk eta bere familiek parte hartuko dute Eskolako Agenda 2030 egitasmoan, guztien artean Tolosaldeko herriak iraunkortasunaren bidean jartzeko.
