/ Aktualitatea / Turismo /
Eusko Jaurlaritzako Turismo, Merkataritza eta Kontsumoko sailak antolatutako Euskadi Gastronomika Sarea osatzen duten enpresen aitorpen-ekitaldira gonbidatuak izan dira Tolosaldeko gastronomia klubeko parte diren eragile ezberdinak. Ekitaldia atzo ospatu zen Ficoban.
Enpresa hauek Euskadi Gastronomikaren balioen gutunarekin bat egin dute eta hauek beraien lan hildoetan txertatu dituzte, 8 baliok osatzen duten gutuna:
1.- Kultura gastronomikoa ulertzeko modu propioa izatea. Hurbileko produktuak eta tradizio gastronomikoa aurkeztea Euskal Herriaren nortasun kulturala zainduz.
2.- Sarean lan egitea. Euskadi helmuga gastronomiko gisa garatzeko konpromisoa hartuz, beste enpresa batzuekin eta lurraldeko beste eragile batzuekin elkarlanean arituz.
3.- Bisitariak etxeko sentiaraztea. Arreta profesional eta pertsonalizatua, giro erakargarri eta abegikor bat sortuz turista bertako gastronomian murgiltzeko.
4.- Egiten duguna mundo zabalera komunikatu. Informazioa digitalizatu, eguneratua mantendu eta bezeroen iritziak entzunez online ospea modu aktiboan kudeatu.
5.- Kalitea eta berritasuna bermatu. Etengabeko formakuntza erraztu eta sustatu, kalitate turistikoarekin konpromezua hartu eta esperientzia gastronomiko bereizgarri bat landu.
6.- Gure lurra, itsasoa eta animaliak zaindu. Ingurune naturala babestu eta mantenduz, sasoiko produktuen aldeko apustua eginez, lurraldearen tokiko garapenaren aldeko apustu irmoa eginez.
7.- Eskaintza inklusibo eta eskuragarria izan.
8.- Euskadiko turismoaren kode etikoaren helburuekin bat egin.
Horrela, Tolosaldean 2012.urtean martxan jarri zen gastronomia turismoa garatzeko planak beste pauso bat ematen du. Hasieratik gastronomia turismoak Tolosaldearen turismo garapen jasangarrian zuen garrantzia ikusirik sarea zabaltzen joan da eta gaur 47 establezimenduk parte hartzen dute eskualdeko turismo gastronomikoa sustatzeko klubean, hauek dira Euskadi Gastronomikaren balioen gutunera atxikitzen direnak.
Tolosaldeko taldean hainbat ekoizle dira beraien ekoizpen proiektuetara bisitak egiten dituztenak, ekoizle gisa beste aktibitate ekonomiko gehigarri bat sortu eta bide batez, bisitak beraien produktua eta egiteko modua balorean jartzeko aukera ezin hobea direla jakitun. Hala nola, Urdapilleta Euskal txerrien eratorrien ekoizlea, Hika eta Inazio Urruzola txakolin upategiak, Balerdipeko erleak ezti eta erlauntzatik eratorritako produktu ekoizleak, Goine, Mahala eta Larreta esneki ekoizleak eta nola ez, Tolosako babarruna elkartea dira partaide.
Horrez gain, sagardo ekoizle diren eskualdeko sagardotegi guztiek parte hartzen dute, Tolosako Isastegi eta Eguzkitza, Adunako Zabala eta Aburuza, Asteasuko Sarasola eta Lizartzako Goikoetxea. Sagardoaren lurraldea ere bai baikara eta sagastien paisaia balorean jartzeko hainbat ekimen ere jarri dira martxan azken urteetan.
Aldi berean, Tolosako azokak ere protagonismo berezia hartzen du proiektuan, izan ere larunbatetako plan gastronomiko erakargarriena izan ohi da azokara bisita. Gida batekin azoka bisitatzeko aukera ematen da ekoizle ezberdinekin hitzegiteko aukera eskainiz eta norberak bere erara bisitatzera ere gonbidatzen dira bisitariak, erosketa zorroa bertako produktuz bete dezaten.
Bisitariari begira, kutixiak erosteko edo eskuratzeko beste gune ezberdin batzuk ere barnebiltzen ditu taldeak, nola ez Eceiza gozotegia, bere Tolosako teila eta zigarrotxo ezagunekin eta Rafa Gorrotxategi, bere txokolate eta euskal herria eta Txokolatearen historia kontatzen duen museoarekin. Baina proiektuaren parte dira baita ere, Barriola harategia, txistorra berezi eta eskaintzen dituen hainbat produktu berezirekin eta Garia okindegia, kalitatezko ama orez egindako ogi eta opilekin.
Gure kultura gastronomikoa, eltze eta parriletan goxatua, mahaian eta barran zerbitzatzen duten enpresen artean, asko dira turismo gastronomikoa sustatzeko lanean ari direnak Tolosaldean: Alkiza, Altzo, Hernialde, Orexa eta Larraulgo (Zirta) ostatuak; Alondegia, Ama, Bailara, Bertakoteka, Bide bide, Bistró IHJ, Botarri, Hika by Roberto Ruiz, IU, Iriarte, Iturri ondo, Larraitz gain, Fronton, Ikatza, Karela, Orbela, Txumitxa eta Xare jatetxe eta tabernak; Burruntzi, Casa Julian eta Nicolas erretegiak.
Eskualdetik talde eder bat joan zen ekitaldira, pozgarria baita urte luzez egindako lanaren aitortza jaso eta sarea ehuntzen jarraitzeko espazioak sortzea. Bide batez Tolosaldeko kultura gastronomikoa zaindu, ikertu eta kontatzeko aitzakia ematen digun lan ildo honek bide luzea izan dezan indarrak hartzeko ere balio izan zuen.
