/ Aktualitatea / Turismo /
Ia %50 igo da, iazko abuztuarekin alderatuta, Tolosaldeko Turismo bulegoak artatu dituen bisitarien kopurua.
Tolosaldea ezagutzera etorri diren bisitarien gorakada izugarria izan da aurtengo udan. Joan den urtean, pandemiak baldintzatuta, beherakada izan ondoren, 2019ko datuak hobetzera ere iritsi da aurtengo uda. Hori adierazten dute uztailan eta abuztuan Tolosaldeko Turismo Bulegoak erregistratutako datuek.
Uztail eta abuztu osoko datuak kontutan hartuta, batez beste %39 igo da turismo bulegoak jaso dituen bisitari kopurua. Are nabarmenagoa da igoera joan den urteko abuztuarekin alderatuz gero, ia erdia baino gehiago hazi baita zifra.
| 2019 | 2020 | 2021 | |
| Uztaila | 1.247 | 939 | 1.171 |
| Abuztua | 1.649 | 1.364 | 2.038 |
| Guztira | 2.896 | 2.303 | 3.209 |
Estatuko turista nagusi, kataluniarra batik bat
Estatuko turisten presentzia bikoiztu baino gehiago egin da 2020arekin alderatuta, 2019ko datuak ere gaindituta. Kataluniarrak izan dira estatuko bisitarien herenak. Ondoren, madrildarrak, valentziarrak eta andaluziarrak dira, hurrenez hurren, eskualdea gehien bisitatu dutenak.
Nazioarteko turista kopurua ere igo den arren, apalagoa izan da igoera, eta pandemia aurreko datuetatik urrun daude. Frantziarrak nabarmendu dira, batik bat.
Okupazioa ere bikoiztu egin da Tolosaldeko nekazalturismo, landetxe eta landa-apartamentuetan
Abuztuan %87ko okupazioa izan dute, bataz-beste, Tolosaldeko nekazalturismo, landetxe eta landa apartamentuek. Beteta egon dira asko, bereziki abuztuan, nahiz eta erreserba horietako batzuk azken unekoak izan ziren.
2020ko okupazio datuekin alderatuta, bikoiztu egin dira datuak. 2019ko datuak ere hobetu dira nekazalturismo eta landetxeen kasuan.
Gainera, 2021eko udan aurrekoarekin alderatuta hainbat irekiera berri izan ditugula kontutan hartu behar dugu:
- Iriarte apartamentuak Orexan.
- Orexa Enea apartamentuak Orexan.
- Agerre berri landetxea Larraulen
- Arkaitza landetxea Berrobin
Tolosaldeak une honetan 49 establezimendu eta 609 plaza eskaintzen ditu, 19 herritan banatuta. Plazen %36 Tolosan daude kokatuta eta, ondoren Asteasun (%13). Gehiengoa, bai establezimendu kopuru eta bai plaza kopurutan, nekazalturismo eta landetxeak dira. Zehazki mota honetako 173 plaza ditugu.
