/ Aktualitatea / Empresa /
Nork gobernatzen du internet? Euskal komunitate digitala erronka globalaren aurrean
- Iametzak antolatutako jardunaldiak 2025eko azaroaren 4an izango dira, Donostiako San Telmo Museoan, 9:00etatik 13:15era.
- “Nork gobernatzen du internet? Euskal komunitate digitala erronka globalaren aurrean” da aurtengo edizioaren leloa.
- Nazioarteko eta bertako hainbat adituk hartuko dute parte.
Korporazio teknologiko handiek espazio digitalaren gainean erabakitzeko boterea kontzentratzen duten testuinguruan, Euskarabildua 2025ek auzi klabe batean jartzen du fokua: Nork gobernatzen du internet?
Teknologia modu burujabe eta kritikoan kudeatzea ezinbestekoa da herritarren eskubideak defendatzeko, kultur eta hizkuntza aniztasuna babesteko eta etorkizun digital justuagoa bermatzeko.
Begirada kritikoa eta globala
XXI. mendean, korporazio teknologiko handiek —Google, Meta, Amazon, Apple, Tesla— aberastasuna pilatzeaz gain, datuak bildu, narratibak moldatu eta nazioarteko sistemaren arauak berridazten dituzte. Institut Cerdàren arabera, 2024an hodeiko zerbitzuen fakturazioaren % 67 AEBko hiru enpresatan soilik kontzentratu zen, eta Interneteko bilaketen % 82 Googleren bidez egin ziren.
Errealitate horren aurrean, Euskarabilduak gogoeta bat planteatzen du:
- Nork hartzen ditu erabakiak interneten?
- Zer interes daude jokoan?
- Zein da euskal komunitate txikien tokia, aukera eta zeregina sare global horretan?
Hitzaldiak eta adituen ahotsak
Topaketan erreferentziazko hizlariek hartuko dute parte:
- Manuela Battaglinik (datuen etikan eta pribatutasunean espezializatutako abokatua) Adimen Artifizialaren inguruko politikak eta geopolitikak eta horiek gure bizitzetan eragiten dituzten ondorioak aztertuko ditu.
- Cristina Caffarrak (Eurostack proiektuaren bultzatzailea eta lehiakortasun ekonomikoan aditua) Eurostack proiektu europarra aurkeztuko du.
- Amadeu Abrilek (abokatua eta .cat domeinuen sustatzailea) interneteko desgobernua nola antolatzen den azalduko du.
- Josu Waliñok (PuntuEUS Fundazioko zuzendaria) gobernantzaren egiturak azalduko ditu Interneten, euskal ikuspegitik.
- Iratxe Esnaolak (Deustuko Unibertsitateko irakasle eta ikertzaileak) hezkuntzaren digitalizazio burujabeaz hitz egingo du.
- Elixabete Garciak (Eusko Jaurlaritzako Eraldaketa Digitaleko zuzendaria) eta Aitor Soroak (EHUko Hitz Katedrako zuzendaria) euskarazko hizkuntza-teknologia propio baten aukeraz eztabaidatuko dute.
- Lorea Arakistainek (PuntuEUS Fundazioko komunikazio arduraduna) eta Asier Etxeberriak (Iametzako negozio ereduen arduraduna) ni.eus aurkeztuko dute, euskarazko posta eta hodei seguruaren proposamena.
Euskal ekimenen erakusleihoa
Hitzaldiez gain, tokian tokiko proiektuentzako lekua ere izango da, burujabetza digitala praktikan nola gauzatzen den erakusteko:
- Bernat Etxepare Lizeoko esperientzia.
- Zibergara, burujabetza teknologikoa sustatzeko elkartea.
Zikloan, hilekoaren jarraipena egiteko euskal aplikazio independentea
Zer da Euskarabildua?
Euskarabildua dibulgazio jardunaldi bat da, euskara eta teknologia uztartzea helburu duena, gizartean eragiten duten eta Euskal Herrian burujabetza digitala eta linguistikoa sustatzea ahalbidetzen duten ekimen berritzaileen hausnarketarako eta hedapenerako gunea. 2012tik antolatzen dute Iametzak, Argiak eta Ametzagaiñak.
Publikoa
Teknologian interesa duen edonori zuzenduta dago, sektoreko profesionaletatik hasi eta teknologiak gizartearentzat nola balio dezakeen aztertu nahi duten herritar, erakunde, enpresa edo elkarteetaraino.
Streaming eta izen ematea
Jardunaldia zuzenean jarraitu ahal izango da EITBren bitartez. Izen-ematea doakoa da, eta dagoeneko irekita dago www.euskarabildua.eus webgunean.
