Arrazakeriarik gabeko Tolosako Inauterien alde

Inauterien atarian, arrazakeriarik gabeko inauteriak ospatzeko dei egin dute Jatorkin, Divina eta Ana Yurd elkarteek. Honako oharra igorri dute:

Tolosako pertsona migratzaile eta arrazializatuen talde eta elkarte hainbatek inauterietako egunok herriarentzat kohesio, topaketa eta aniztasun guneak izatea espero dugu; horregatik, estereotipo, aurreiritzi eta indarkeria arrazista zein sexistarik gabeko guneak izatea ere nahi ditugu.

Gure ustez, beharrezkoa da ARRAZAKERIAren aurrean birpentsatzen jartzea eta jarrera aktiboa hartzea.

Tolosako inauterietan parte hartuko duten herritarrei dei egiten diegu mozorro eta/edo karrozetan jarrera arrazistarik ez izateko, ulertuta kulturak eta etniak ez direla mozorro bat, kultura baten irudikapen estereotipatu eta negatibo baten erreprodukzio bat baizik, non, pribilegiotik, egun batez mozorro gisa erabiltzeko, ez duten pentsatzen irudikatzen ari diren horren esanahi kulturalean eta eragiten duten indarkeria sinbolikoan.

Blackface-aren aurka ere aldarrikatzen gara (hau da, beltzez mozorrotzen diren pertsona zuriak edota aurpegia margotzen dutenak, besteak beste), belztasuna ez baita mozorro bat.

5 galdera* aurkezten dizkizuegu, nahi gabeko arrazakeria saihesteko.

Erantzun…

1. Zein talde etniko/arraza/kultur taldetakoa da erabiltzen ari naizen jantzi edo artikulua?
2. Zerk bultzatzen nau mozorro hau aukeratzera? Nire pribilegioek? Nire aurreiritziek?
3. Praktika edo artikulu honi dagokion taldea diskriminatuta edo zapalduta dago?
4. Norbait deseroso sentiarazi dezaket?
5. Mozorroa bera eramateak, mesederik egiten dit? Zertan?

Honegatik guztiagatik, Tolosako Inauterietako partaideei jai guneak birplanteatzea gonbidatzen diegu, garaia baita praktika arrazistak alde batera uzteko eta indarkeria mota hauei modu aktiboan aurre egiteko.

*Afrogruivxs eta Chaimaa Aboukharsaren argitalpenetan oinarrituta.

Jatorkin, Divina Emakume Nigeriarren Elkartea eta Ana Yurd