/ Aktualitatea / KIUB /
2006tik 2013ra bitartean ibilgailuak erosi zituzten pertsonak autoen kartelak kaltetutakoen artean egon daitezke. Kasu horretan, kalte-ordaina erreklama dezakete.
Horrelako kasuak bide judizialetik izapidetu behar dira, eta epaileek kasuz kasu epaitu behar dituzte. Lehenik eta behin, erreklamatzailea benetan kaltetua izan den egiaztatu beharko dute, eta, hala bada, dagokion kalte-ordain zehatza kuantifikatu beharko dute. Markaren, modeloaren eta ibilgailuaren matrikulazio-urtearen arabera eta ibilgailua erosi zeneko kontzesionarioaren arabera aldatuko da. Horrek guztiak aditu-txosten baten babesa izan behar du. Gaur egun, epai judizialak ibilgailuak ordaindutako balioaren %5 eta %10 bitarteko kalte-ordainak aitortzen ari dira.
Demandatzaile gisa jarduten duen pertsonak abokatuak eta prokuradoreak lagunduta joan beharko du. Gainera, peritu ekonomiko baten laguntza beharko du, kasuan kasuko peritu-txostenaren bidez kartelak eragindako kalteen norainokoa zehazteko.
Hori gauzatzeko, kaltetuek 2 aukera dituzte:
- Profesional horiek beren kontura kontratatzea.
- Kontsumitzaileen elkarte pribatu batean bazkide gisa izena ematea, hala nola UCE, ACUV, OCU, FACUA, ADICAE… Kasu horretan, elkarteak bazkide kaltetuaren izenean eta ordezkaritzan izapidetuko luke gaia eta, aldi berean, aipatutako profesionalengana joko luke. Horri dagokionez, aipatzekoa da bazkide-kuotak ez dituela barne hartzen abokatuaren, prokuradorearen eta perituaren ordainsariak. Beraz, zer gastu izan ditzakegun jakiteko, funtsezkoa da enkargu-orri profesionala eskatzea.
Epaia aldekoa bada, profesional horiek lortutako kalte-ordainaren ehuneko jakin batekin geratu ohi dira, beren ordainsariak ordaintzeko. Ehuneko hori %15etik %20ra bitartekoa izan ohi da, adostutakoaren arabera. Hala ere, epaia aldekoa ez bada, nahi ez diren ezustekoak saihesteko, demandatzaileak oso argi izan behar ditu profesional horiek kobratuko dizkioten zenbatekoak. Horretarako, lehen aipatutako enkargu-orri profesionala eskatu, irakurri, ulertu eta aztertu behar du aldez aurretik.
Garrantzitsua da gogoraraztea preskripzio-epea 2026ko apirilaren 19an hasi zela marka batzuentzat, eta urte amaieran amaituko dela beste batzuentzat. Beraz, oraindik zer egin erabaki ez dutenentzat, Tolosaldeko KIUBaren aholkua da judizioz kanpoko erreklamazio fede-emailea egitea, bai ibilgailua erosi zuten emakidadunari (oraindik irekita jarraitzen badu), bai markari berari, beti ere aipatutako epeak amaitu aurretik. Hori guztia preskripzio-epea geldiarazteko eta preskripzio-epeak aurrera ez egiteko, aurrerago auzitara jotzea erabakiko balute ere. Izan ere, auzibidera jo aurretik, beharrezkoa eta ezinbestekoa da judizioz kanpoko erreklamazioaren aurreko urratsa.
Nola egin daiteke judizioz kanpoko erreklamazio fede-emailea? Erreklamazio-idazki bat bidali behar zaie bai emakidadunari, bai markaren bezeroarentzako arreta-zerbitzuari, jaso izanaren jakinarazpena duen posta ziurtatu bidez edo, ahal bada, burofax bidez; betiere, idazkiaren kopia bat gorde behar da, CORREOSek emandako egiaztagiriekin batera.
Merkatuen eta Lehiaren Batzorde Nazionalaren (CNMC) webgunerako honako esteka honetan kontsulta daitezke ibilgailuen kartelak eragindako markak eta horien helbideak:
https://www.cnmc.es/sites/default/files/685749_68.pdf
