Merkatuen eta Lehiaren Batzorde Nazionalak (CNMC) ohartarazi du argiaren eta gasaren enpresa merkaturatzaile txikiak batzuk ixteko arriskuan direla, porrot egiteagatik, batez ere 2021 urtearen hasieratik elektrizitatearen eta gasaren handizkako prezioak neurriz kanpo igo direlako.
Halakorik gertatuz gero, kontsumitzaileek jakin behar dute beren kontratuak automatikoki erreferentziazko merkaturatzaile batera pasatuko liratekeela, eta, beraz, PVPC tarifarekin araututako merkatura pasatuko liratekeela, lehengo kontratua merkatu librean izan arren.
Merkatu arautuko merkaturatzaile berriak hornitze-baldintza berriak jakinarazi beharko dizkio kontsumitzaileari, eta kontsumitzaileak aukera izango du merkatu arautuan (PVPC tarifan) jarraitu nahi duen edo merkatu libreko merkaturatzaile berria kontratatu nahi duen.
Ohartarazi behar dugu, kasu horretan, kontsumitzaileak bonu soziala jasotzen badu, merkatu arautuan mantendu behar duela bere kontratua, fakturan dagozkion deskontuak izaten jarraitzeko.
Gogorarazten dugu halaber, telefonoz edo online kontratazioren bat eginez gero, komeni dela aldez aurretik eskatzea kontratazioaren baldintza guztiak bidaltzeko, eta horiek arretaz irakurri behar direla kontratatu aurretik. Gainera, kontratazioa egin ondoren, sinatutako kontratuaren kopia bat bidaltzeko exijitu behar da.
Bestalde, mota horretako kontratazioetan, online edo ez-presentzialki egindakoetan, kontratazioa egin ondoren, 14 eguneko epea dugu kontratuari uko egiteko eta konpainiari modu fedegarri batean jakinarazi behar izango diogu.
